Psixologiya elminin müasir inkişaf səviyyəsinə müvafiq olaraq məhkəmə-psixoloji ekspertizasının səlahiyyətinə aşağıdakı məsələlər aid edilir:

- şəxsin öz hərəkətlərinin mahiyyətini dərk etmək və öz hərəkətlərini idarə edə bilmək qabiliyyətinin psixi xəstəliklə bağlı olmadığı halda müəyyən edilməsi;

- əqli inkişafdan geri qalma və ya ləngimə məsələlərinin müəyyənləşdirilməsi;

- şəxsin iş üçün əhəmiyyətli olan halları adekvat olaraq qavramaq və ifadə vermək qabiliyyətinin müəyyənləşdirilməsi;

- baş vermiş hadisələri qavramaq, mahiyyətini anlamaq, onları  yadda saxlamaq və yada salmaq qabiliyyətinin öyrənilməsi;

- zərərçəkmişin hərəkəti nəticəsində təqsirləndirilən şəxsdə fizioloji affektin və ya qeyri-patoloji emosional halların (emosional oyanma, emosional stress, frustrasiya və s.) yaranmasının müəyyənləşdirilməsi;

- davranışın psixoloji motivini və mexanizminin müəyyənləşdirilməsi;

- şəxsin idrak proseslərinin və fərdi-psixi xüsusiyyətlərinin müəyyən edilməsi;

- ölümündən əvvəl suisidentin davranışına təsir etmiş psixoloji amillərin və onun hadisədən əvvəlki dövrdə psixi-emosional vəziyyətinin müəyyən edilməsi;

- cinayətkar qrupun qeyri-formal strukturunun və qrup üzvlərinin psixoloji xüsusiyyətlərinin öyrənilməsi;

- ailədaxili qarşılıqlı münasibətlərin və ailə şəraitinin, eyni zamanda valideynlərin fərdi-psixi xüsusiyyətlərinin uşağın psixi inkişafına və emosional-iradi sferasına təsirinin müəyyən edilməsi;

- ailədə (nikahın pozulması ilə əlaqədar) uşaqların konkret şəxslər (ata, ana və ya başqaları) tərəfindən tərbiyə olunması imkanlarının psixoloji əsaslarının müəyyən edilməsi.

Qeyd: məhkəmə-psixoloji ekspertizası məhkəmə-tibbi ekspertizasına aid olmayıb, «psixoloji və psixofizioloji ekspertizalar» sinfinə daxildir, belə ki, məhkəmə-psixoloji ekspertizası psixi cəhətdən sağlam olan şəxsin psixi fəaliyyətinin iş üçün əhəmiyyət kəsb edən hallarını müəyyənləşdirir. Cinayət və mülki işlər üzrə məhkəmə-psixoloji ekspertizası təyin edilərkən qeyd olunanları nəzərə almaq məqsədəuyğundur.

Məhkəmə-psixoloji ekspertizasının təyini zamanı işin hallarından asılı olaraq aşağıdakı kimi suallar qoyulur:

İş üçün əhəmiyyətli halların qavranılmasının və onlar haqqında düzgün ifadə vermək qabiliyyətinin məhkəmə-psixoloji ekspertizası üzrə

- Müayinə olunan şəxsin sensor-perseptiv proseslərinin fərdi xüsusiyyətlirini və hadisə şəraitini nəzərə alaraq, onun iş üçün əhəmiyyətli halları düzgün qavraya bilməsi müəyyənləşdirilsin.

- Həssaslıq və onun hədləri, ifadə verən şəxsə, hadisənin baş verdiyi şəraitin malik olduğu qıcıqlandırıcıları duymağa və ya qavramağa imkan verə bilərmi?

- Müayinə olunan şəxs təlqinə qapılmağa, başqalarının təsiri altında hərəkət etməyə meyllidirmi?

- Müayinə olunan şəxs özündən uydurmağa meyllidirmi?

- Müayinə olunan şəxs hansı fərdi-psixi xüsusiyyətlərə malikdir?

Şəxsin özünün və ona qarşı edilmiş hərəkətlərin mahiyyətini dərk etmək qabiliyyətinin məhkəmə-psixoloji ekspertizası üzrə

- Müayinə olunan şəxs hansı fərdi-psixi xüsusiyyətlərə malikdir?

- Müayinə olunan şəxsin əsas fərdi-psixi xüsusiyyətləri hansılardır və bu xüsusiyyətlər ona qarşı hüquqazidd hərəkətlər edilərkən necə təzahür olunmuşdur?

-Müayinə olunan şəxs yaş xüsusiyyətləri və intelektual inkişafı nəzərə alınmaqla, onunla edilən hərəkətlərin xarakter və mənasını anlaya bilərdimi?

- Müayinə olunan şəxs ona qarşı edilən hüquqazidd hərəkətlərdən əvvəl, baş vermiş hadisə zamanı və hadisədən sonra hansı psixi-emosional halda olmuşdur, həmin psixi-emosional halların dinamikası necədir?

- Müayinə olunan şəxs özünün psixi yaş və fərdi-psixi xüsusiyyətlərindən, intelektual inkişafı və emosional halından asılı olaraq, müqavimət göstərmək qabiliyyətinə malik olmuşdurmu?

- Müayinə olunan şəxsin psixi vəziyyəti müqəssirin ona qarşı etdiyi hərəkətlərin nəticəsində yarana bilərdimi?

- Müayinə olunan şəxsin əqli inkişafında gerilik əlamətləri varmı?

- Müayinə olunan şəxsin psixi inkişafını nəzərə alaraq, onun yaranmış şəraitin mahiyyətini tam dərk etməsi və davranışının mümkün nəticələrini görə bilməsi müəyyənləşdirilsin.

Yetkinlik yaşına çatmamış təqsirləndirilən şəxslərin məhkəmə-psixoloji ekspertizası üzrə

- Yetkinlik yaşına çatmamış şəxsin səciyyələndirən əsas fərdi-psixi xüsusiyyətlər hansılardır?

- Yetkinlik yaşına çatmamış şəxsin əqli inkişafında gerilik əlamətləri müşahidə olunurmu?

- Əqli və psixi inkişafını nəzərə almaqla, yetkinlik yaşına çatmamış şəxs öz hərəkətlərinin  mahiyyətini dərk edə bilərdimi?

- Əqli və psixi inkişafının xüsusiyyətlərinə görə, yetkinlik yaşına çatmamış şəxs öz hərəkətlərini idarə etmək qabiliyyətinə malikdirmi?

Psixi-emosional halların məhkəmə-psixoloji ekspertizası üzrə

- Təqsirləndirilən şəxs hansı fərdi-psixi xüsusiyyətlərə malikdir?

- Emosional halından (fizioloji affekt, stress, frustrasiya və s.) asılı olaraq, təqsirləndirilən şəxs öz hərəkətlərini tam dərk etmək qabiliyyətinə malik olmuşdurmu?

- Təqsirləndirilən şəxs cinayət əməlini törədərkən, hansı psixi-emosional halda olmuşdur?

- Cinayət əməlini törədərkən, təqsirləndirilən şəxsin keçirdiyi emosional halın yaranma səbəbləri nədən ibarətdir?

- Təqsirləndirilən şəxs cinayət əməlini törədərkən fizioloji affekt halında olmuşdurmu?

Suisidal halların məhkəmə-psixoloji ekspertizası üzrə

- İntihar etmiş şəxsin (suisidentin) fərdi-psixi xüsusiyyətləri hansılardır və bu xüsusiyyətlər onun özünü öldürməsində necə təzahür etmişdir?

- İstintaq fərziyyəsinə görə özünü öldürmüş şəxsdə, ölümündən əvvəlki dövrdə hansı psixi-emosional hal olmuşdur və bu hal hansı amillərlə şərtlənmişdir?

- Suisidentdə ekstremal psixi vəziyyətin (fizioloji affekt, stress, emosional-psixi gərginlik, frustrasiya və s.) yaranma səbəbləri nədən ibarət olmuşdur?

- Təqsirləndirilənin hərəkətləri ilə (dəqiq göstərməli: məs., zorlama, qəddarcasına münasibət və ya mütəmadi olaraq şəxsi ləyaqətinin alçaldılması və s.) zərərçəkmişin ölümündən əvvəlki dövrdə keçirmiş olduğu psixi-emosional halı arasında səbəbli nəticə əlaqəsi mövcuddurmu?

Cinayətkar qrupun məhkəmə-psixoloji ekspertizası üzrə

- Qrup üzvlərindən hansı şəxs özünün fərdi-psixi xüsusiyyətlərinə görə qrupda lider mövqeyi tuta bilər?

- Təqsirləndirilən şəxslərdən kim təlqinə qapılmağa, təsir altına düşməyə, tabe olmağa, qorxaqlığa, zəif iradi keyfiyyətlərə malikdir?

- Təqsirləndirilən şəxslərin psixi inkişaf səviyyələri necədir?

Yol-nəqliyyat hadisələri ilə əlaqədar məhkəmə-psixoloji ekspertizası üzrə

- Konkret şəraitdə, sürücünün yolda dayanmış maşına qədərki məsafəni düzgün qiymətləndirməsinə hansı psixo-fizioloji amillər təsir edə bilərdi?

- Baş vermiş yol hadisəsi zamanı sürücünün davranışı onun real reaksiya imkanına uyğun olmuşdurmu?

- Zərərçəkmiş piyadanın maşın vurmazdan əvvəlki hərəkətini psixoloji cəhətdən əsaslı hesab etmək olarmı?

- Müayinə olunan şəxsin qəza hadisəsindən əvvəlki, hadisə zamanı və ondan sonrakı davranışına hansı psixi xüsusiyyətləri əhəmiyyətli dərəcədə təsir gəstərə bilərdi?

- Hadisə baş verən zaman (və ya hadisə baş verəndən sonra) sürücünün psixi-emosional vəziyyəti necə olmuşdur?

Avtomatlaşdırılmış sistemlərin idarə edilməsi zamanı baş vermiş qəza hadisələrinin məhkəmə-psixoloji ekspertizası üzrə

- Müayinə olunan şəxs hansı fərdi-psixi xüsusiyyətlərə malikdir və bu onun davranışına təsir edə bilərdimi?

-  Hadisə baş verən zaman müayinə olunan şəxsin psixi-emosional vəziyyəti necə olmuşdur?

- Qəza hadisəsinin baş verdiyi avtomatlaşdırılmış sistem mühəndis-psixoloji tələblərə uyğundurmu?